Летчикенть Сергей Устиновонь менелентень вечкемазо! (ЭРЗЯ)
Сергей Устиновонь лемезэ республикасонок содавикс. Комсте ламо иеть макссь вечкевикс тевентень – ливтнемантень. 2 тёжат 500-до ламо часст – зняро ульнесь менельсэ. Республикасонок ютавтовиця покшчитнестэ сон свал учовиця инже. А манявтано, бути мертяно, викша поране малав весе цёрынетне арсить улемс лётчикекс эли космонавтокс. Истя лиссь течинь минек героенть мартояк. Сергей Устинов – «Кубинка» авиабазань лётчик, чачь Кочкурбуень Пурня велесэ. Харьков ёнксонь авиационной училищань реактивной самолётонь эксплуатациянь отделениянь прядомадо мейле, 20 иеде ламо макссь ливтнема тевентень. Кемзисемге иесэ васенцеде ськамонзо кепедизе верев учебной самолётонть. Се чинть сон а стувтсы зярдояк. Сергей Устиновонь эрямосто зярыя иеть сюлмазельть Саранонь аэроклубонь марто. Ютазь пингень 60-це иетнестэ партиянь обкомонь мереманзо коряс, те аэроклубсонть пурназельть Мордовиясто колмо наборт. Вейкентень понгсь Сергей Устиновгак. Ней сон Мордовиясо сеедьстэнь инже. Свалшкане бажи содавтомс музеенть, конань марто сюлмазь ламо ледстнемат. Фотографиятнесэ тонавтнема шкань ялганзо, коллеганзо. Музеень важодицятне кенярдыть истямо вастовоматнес. Кие соды, кодамокс улевель те ломанень эрямозо, бути аволь шабразо, кона макссь тензэ вечкема менелентень!? Школасо тонавтнемстэ Сергей арсесь улемс баянистэкс, 5 иеть тонавтнесь музыкальной школасо. Устиновтнень кудораськесэ вете эйкакшт, эрямосост весе муизь эсест кист. Сергей Николаевич лембестэ корты тетядоно-авадонзо, кавто сазортнэде ды кавто ялакстонзо. Бути муеви ютко шка, свал покш мельсэ ютавты сонзэ тиринь велесэ, тетянзо-аванзо вакссо.