Краснослободскяй районца панжевсь «Эряк, шачем кяль!» этнокультурнай лагерсь (В Краснослободском районе открылся этнолагерь «Живи, родной язык!») МОКША
Эрь кизоня республикасонк етафневи «Живи, родной язык!» межрегиональнай культурнай этнолагерь, коза пуромкшнихть мокшень, эрзянь, татаронь кяльхнень и литературать коряс республиканскяй и межрегиональнай олимпиадаса, а стане жа региональнай ламоц конкурсса сяськихне и призерхне. Вов ни аф васенце кизось тя лагерсь етафневи Краснослободскяй райононь «Сивинь» идень лагерьса.
Тядде «Эряк, шачем кяль!» этнокультурнай лагерсь торжественнайста панжезень кенкшензон 9 июльста. «Сивинь» лагерьса иттне кармайхть улема 26 июльти. Тя пингста синь васьфтихть мокшень и эрзянь кяльса сермадыхнень мархта. Тяса жа етафтови «Тюштянь налхксемат» пялькстомась. Кармайхть улема мастер-класст вокалть, хореографиять, театральнай искусствать и декоративно-прикладной творчествать коряс. И эрь шиня – занятият родной кяльса.
87 идь Мордовияста и Россиянь 7 регионцта колма недялят кармайхть ваймосема республикать фкя инь мазы вастсонза. Тоза кочкавсть иттне 8 кизоста сявомок 17 молемс. Сембе синь – мокшень, эрзянь и татаронь кяльхнень и литературать коряс олимпиадаса сяськихть.
Этнокультурнай программась лагерьса арьсеф стане, штоба шабатне коль сяда оцю мяль шарфтольхть родной кяльть тонафнеманцты, нароттнень культурно-историческяй, духовно-нравственнай ширеснонды. Аф емла васта максф региоттнень еткса сотксонь ладямати, ялгакс арамати, эряфонь шумбра койхненди.
Этнокультурнай сменать панжемац етась пяк мазыста. Колма шиста иттне анокласть козя концертнай программа. Пингстонза кайгсь мокшень, эрзянь и татаронь морот.
Тя этнолагерсь етафтови кафксоцеда. И тя пингста кельговсь иттнеди. Кой-конатне сашендыхть тяза кафксь-колмоксть. И афкукс тяса ваймамась – цебярь казне образованиянь министерствать эзда сятненди, кит тонафнемань кизоть пингста оцю мяль шарфнесть тядянь-алянь кяльхненди.