Коми республикасо юты финнэнь-угрань раськень 6-це инекужось! (ЭРЗЯ)
Сыктывкар ошсо полады роботанзо финнэнь-угрань раськень 6 инекужось. Ютась пленарной заседания, конань лувсо финнэнь-угрань раськень ломантне тиринь кельсэ евтнесть седе, кода ванстовить сынст кельтне ды культурась. Карелтнэ тешкстасть, сынст республикасо келенть течинь чис арась государственноень статусозо. Сету раськесь, конатнеде кадовсть 200 ломанть, бажи од ломантнень содавтомс келенть ды культуранть марто. Минек раськенть пельде мокшонь кельсэ доклад тейсь эрзя-мокшонь раськень регионъютконь вейсэндявксонь прявтось Юрий Мишанин, эрзянь кельсэ – МР-нь правительстванть пингстэ гуманитарной наукань НИИ-нь ведущей научной сотрудникесь Александра Каторова. Александра Михайловна тешкстызе – тиринь кельтнень ванстомс эряви, но а эряви стувтнемс минь, васняяк, Россиясо эрицят ды кортамонь межкультурной келекс каднови рузоньсесь. Александра Каторова евтнесь, тиринь келесь Мордовиясо тонавтови эйдень кужосо, школасо, вузсо. Течинь чис панжадокс каднови тиринь келень ды литературань тонавтомапельтнень нолдамонь коряс кевкстемась.