Колмо чинь перть Москов ошсо ютась А. Пушкинэнь чачома чинтень ды рузонь келень чинтень алтавиця книгань фестиваль. (ЭРЗЯ)
Россиянь малав 400 издательстват невтизь тосо эйкакшонь, тонавтомань, научно-популярной литературанть. Мордовиянть пельде молицятнень эйстэ вейкекс ульнесь Татьяна Мокшанова. Эрьва раськесь невтизе тесэ эсензэ литературанть. Мордовиянь книгань выставканть вакссо ульнесь ламо сыцят. Седеяк мельспаро ульнесь се, што ламо кевкстемат ульнесь максозь Татьяна Мокшанованень ды Рая Орлованень тиринь оршамопелест коряс. Ламотнень ульнесь мелест теемс фотографият эрзяванть ды мокшаванть марто. Фестивалень читнестэ ютавтозель «Россиясо эриця раськетнень поэзиянь» антологиянь презентациясь. Ледстясынек, книгас совавтозельть 751 произведеният. Роботасть сонэ лангсо 800 ломанть, 142 сынст эйстэ – ютавтыцят. Васенце томсонть невтевить произведениятнень оригиналтнэ ды ютавтовкстнэ, конат сёрмадозельть меельце комсь вете иетнень перть. Текстнэнь эйстэ ламотне рузонь кельс ютавтозельть васенцеде ды ансяк те антологиянть кисэ. Книгас совасть эрьва литературной кельденть очеркть ды автортнэде нурька библиографической справкат. Мордовиясто антологияс совавтозельть кемень сёрмадыцянь произведениятне. Фестивалень те иень башка ёнксокс кармась се, што масторонь прявт ошсонок комсь кельсэ ловнызь Александр Пушкинэнь «Я памятник себе воздвиг нерукотворный» валморонть. Комсеце строчканть ловнызь эрзянь кельсэ.