Кодамокс ульнесь «Литературань иесь» «Сятко» журналонть туртов (Каким был для журнала «Сятко» «Год литературы») ЭРЗЯ

Иеде иес «Сятко» журналось яла кассь ды кемекстась. Панжовсть од рубрикат, муевсть од лемть, конат седе тов кеместэ совасть минек литературантень. Тёжа вейксэсядт колоньгемень колмоце иень ушодовомсто «Сяткось» яволявтозель литературано-художественной ды обществаннно-политической журналокс, покш тарканть кармасть саеме эйсэнзэ литературань сёрмадовкстнэ. Течинь чистэ тесэ роботы а покш, но пек виев  творческой коллектив, конась свал вешнемасо. Эрьва номерэнь анокстамонтень   сынь путыть ламо вий. Свал кецявтыть ловныцяст мейсэяк одсо. Покш важодема ютавтови тесэ ушодыця сёрмадыця марто. Татьяна Разгуляевань, «Сятко» журналонь прявт редакторонть валонзо коряс, одтнэнь ютксо муевить пек ёроков сёрмадыцят, ансяк сынденст а эряви стувтнемс ды свал бажамс лездамо! Эряви тешкстамс, сех покш стакачикс эрьва периодической изданиянть туртов ашти сёрмадстома шкась. Кандови те  «Сятконтеньгак». Сонзэ важодицятненень сави ламо шка ютавтомс сёрмадстомас, вастневемс аволь ансяк минек республикасо эриця ловныцятнень марто, ардтнемс мик лия регионгаяк. Журналонть анокстамосо, нама, сеедьстэ вастневат эрьва кодамо стакачи марто. Но мезеяк лангс апак вано редакциясь, прявт редакторонть марто вейсэ, кеме эскелькссэ моли ансяк икелев. Сыця иестэнть  сонзэ ловныцятнень учить казнеть. Кодат, несынек овсе курок!