Кочкуровань районсо ютась «Кодамо моро минь моратано?» тонавтомань васенце промкс. (ЭРЗЯ)
Коень коряс Йовлань Олонь лемсэ «Этно-кудонть» икеле весень туртов ютавтозель «Састь инжеть» вастомань кой. Тонавтомань промксос сыцятненень явшезельть вишка сюлминеть ялгаксчинь кемекстамга. Сюлмамсто свал эряви арсемс малавикстнэде ды паро тевде. Теке марто эсь потсо эряви ёвтамс мель-арсема ды бажамо. Теде мейле Йовлань Олонь кеврунгонзо ваксс путозельть цецят. «Кодамо моро минь мортатано?» тонавтнемань промкссонть ютавтозель экскурсия Йовлань Олонь лемсэ «Этно-кудонь» музейганть, анокстазель «Весе минь СССР-стэ» васенце ретро-невтевкс. Инжетне содавтовсть «Эрьмезь» вейсэндявксонь чувтосто керсезь налкшкетнень марто, весе вейсэ морасть эрзянь мазый морот. Пётр Рябовонь валонзо коряс, эрзянь кезэрень моронть ванстомасо улить стакачить, секскак сась мель ютавтомс истямо промкс. Промкссо ульнесть морыцят Московстояк. Сынь кадовсть покш мельспаро максозь содамочитнень эйстэ. Ульяновск ёнксонь инжесь Александр Бурлаков пек мелявты эрзянь кезэрень моротнень ванстомаст коряс. Поладовсь тонавтомань промксось Пакся Тавлань культурань кудосо. Эрзянь оршамотнень, налксематнень, келенть, культуранть, литературадонть кортасть тердезь инжетне, конатнень ютксо Маризь Кемаль, Татьяна Тюрина ды ламо лият. Кортамотнень поладызь вайгелень путомань, морамонь, налксемань коряс тонавтовкстнэ. Фольклоронь ансамблянь ветицятненень казезельть эрзянь моро марто аудио-дискть. Прядовсь тонавтомань промксось «Торама» фольклорной ансамблянь ды «Мерема» фольклорно-этнографической студиянь концертсэ.