Кочкурбуень Сурвелесэ ютась Геннадий Аверкин налксицянть лемс футболонь пелькстамо. (ЭРЗЯ)

«Орбита» эйкакшонь оймсемань кужось васты Геннадий Аверкинэнь лемс ютавтовиця футболонь 22-це пелькстамонь налксицятнень. Вастовомань прявт путовкстнэ – футболонтень мелень кастома, васняяк, 2018-це иень масторлангонь Чемпионатонтень анокстамонь лувсо, шумбрачинь витема, ды Аверкиндэ свалшкань лецтнема. Пелькстамось ютавтови 1986-це иестэ саезь. Эрьва кизна сонзэ пурныть налксицянть малавиксэнзэ ды ялганзо. Юрий Дадаев Аверкинэнь марто налксесь «Чайка» Сурвелень командасо республикань ды буень пелькстамотнесэ. Зярыя иеде теде икеле сон пурнась-тейсь «Сурвеле» команда, конань марто ардтни ламо пелькстамос ды сайни таркат. Пси пертьпельксэнть лангс апак вано, Аверкинэнь лемс пелькстамонтень састь 6 командат – Саран ошсто, Кочкуровань буестэ, «Орбита» эйкакшонь оймсемань кужосто ды лия таркасто. Ламот састь васенцеде. Сынст ютксо «Отяжеле» командань эрзянь од цёратнеяк, конат мельспаросо налксить эрьва кодамо пелькстамосо. Весе налксематнень ютавтомадо мейле 1-це тарканть саизе Саран ошонь «Барс» командась, кона 2:0 счётонть марто финалсо изнизе саранскоень «Маяконть». Колмоце таркасо – «Отяжелесь».