Кирдезь фкя мяльса (мокша)
Мордовияса макссть ушеткс республикань предприятиятнень оцюняснонды православнай теологиять коряс образовательнай программати. Тонафнемать ётафтсы Саранск ошень духовнай семинариясь.
Саранск ошень духовнай семинариянь попечительскяй советть мекольдень пуромксонза Виктор Бирюков азозе арьсеманц: панжемс предприятиятнень оцюняснонды православнай теологиять коряс курст. Мяльть кирдезь и ковста тисть аф фкя лацонь программа. Тяниень пингть попечительскяй советс сувсихть 28 ломатть — нят вяти предприятиятнень и компаниятнень покодисна. Оцюнятнень инголе ащи лама задача и управленческяй, и хозяйственнай деятельностьса, ёткссост и спецоперациянь участникненди лезксонь максомась. Программась арась эрявиксокс. Улема, сай пингста сон кармай духовнай образованиянь пяльксокс. Тонафнемань курссь лувф сяда котгемонь частс. Занятиятне ётафтовихть дистанционно. Курссь мольфтеви июнь ковс.