“Казеде книгатнень вечкема марто” (эрзя)
Даволковонь 12 чистэ саезь 18 молемс юты весе Россиянь “Дарите книги с любовью” 8-це акциясь. Сонензэ вейсэнди Мордовияськак. А.С. Пушкин лемсэ раськень ловнома кудосо тень туртов анокстазь книгань пурнамонь кис лався. Тезэнь мереви кандомс кудонь библиотекасто кода одт, истя вечкевикс, ды уш ловнозь произведеният.
Акциянь ютавтомань шкасто пурназь книгатне, пештясызь ловнома кудонь фондтнэнь аволь ансяк минек республикасо, истяжо максовить Россиянь Федерациянь од региононь ловнома кудотнес. Истяжо акциянть лувсо книгат пурны Мордовиянь эйкакшонь ловнома кудось. Ледстясынек, “Дарите книги с любовью” акциясь алтави книгань каземань Раськеютксонь чинтень, кона тешкстави даволковонь 14-це чистэ.
Мероприятиянь прявт тевесь – сыргавтомс ломантнень каземс паро книгат ды одс ледстямс, конёвонь нолдавкстнэ а ёмавтыть эсест питнечинть ды, кода икелеяк, кадовить сех вадря казнекс.