«Карусельки» эйкакшонь вокальной студиянь репертуарсо- «Эмежнетне» ды «Икелев» эрзянь кельсэ морот (ЭРЗЯ)
17 иетнень перть, зярс ули те студиясь, эрзянь кельсэ морост арасельть. Студиянь художественной ветицясь Ольга Антипованень сась мель, витемс те тевенть ды вана уш зярыя ковонь перть сцена лангсто рузонь, англань моротнень марто рядсек гайгить эрзянь кельсэ морот. Ютазь иень сундерьковсто саезь «Карусельки» эйкакшонь вокальной образцовой студиянь вишка группась кармась морамо «Эмежнетне» моронть. Сон истя вечкевсь кунсолыцятнень ды морыцятнень туртов, што студиянь художественной ветицянтень сась мель тонавтнемс эйкакштнэнь марто ещё морот эрзянь кельсэ. Шкань ютазь морось, конань ней морыть покш группань эйкакштнэ, сёрмадозель. Те студиясонть ней морыть малав 90 эйкакшт, иень коряс явозь колмо группас. Репертуарсост неень шкань композитортнэнь морот, эйкашонь эстрадань, весе сынь мазылгавтозь киштемасо. Эрзянь кельсэ моронь сермадыцясь Андрей Бочканов паро мельсэ важоди те студиянть марто. Зярыяксть ульнесь репетициясост, кунсолось, кода эйкакштнэ тонавтнить моронь текстнэнь, видестэ-арась ёвтасызь валтнэнь. Иень перть студиясь яксесь Россиянь ламо оштнэва, ульнесть эрьва-кодамо пелькстамосо, косо ламоксть лиснесь изницякс. Кизэнь самось сыненст — аволь оймсема шка. Ней сынь макснить концерт эйкакштнэнь туртов, конат оймсить школань лагерьтнесэ. Меельце иетнень перть студиясь нолды моронь дискть. Ней уш эйстэдест кото. Эрьва морос ставить оршамопельть. Эрзянь моротнес стазь оршамопельтне пек вечкевить вишка артисттнэнь туртов.