Инечиденть. (О Пасхе) ЭРЗЯ
«Инечи» валось сась грекень кельстэ, смустезэ «идема, вастовома». Те чистэнть минь кенярдтано Спасителенть вельде идемевсенть эйстэ ломантнень идемантень. Христосонь Вельмемась – те минек кемемань юр, сех покш алкуксонь видечи, конань васняяк кармасть сравтомо мода-масторонть келес апостолтнэ. Минек масторсо те покшчинть кармасть тешкстамо кеменце пингестэ саезь. Инечись свал ульнесь весень туртов сех учовикс ды вечкевикс покшчикс. Сондензэ икеле кирдильть пост. Ломантне тенень куватьс анокстасть, шлясть, ванськавтсть эрямо таркаст. А суббутань чокнестэнть якильть церьковав. Пелеведенть икеле баягань чавомасо яволявтови Христосонть вельмевтемадо кулясь. Седе тов церькованть перька юты крестной ходось. Службась моли валскес, а сондензэ мейле ломантне ёвтыть вейкест вейкест туртов поздоровт Инечинть марто. Литургиянь прядовомадо мейле светясть артозь алтнэнь, Инечинь калацятнень. Кудов велявтомадо мейле ломантне озныльть ды ярсыльть светязь ярсамопельтнень. Теньсэ покчись а прядови – 40 чинь перть ломантне славить Спасителенть. Алонь артомань коесь истяжо састь миненек кезэрень шкатнестэ. Сынст явшизь Инечистэнть весенень, кие понги каршо. Малав весе Инечинь кезэрень койтне пачкодсть и минек читнес.