Идень книгат. (МОКША)
Мордовияса ноляви ламоц книгатне лац няфнесазь тячиень эряфть сембе ширензон. Тянь эса оцю путксна мокшэрзянь идень писательхнень и поэттнень. Синь няфнесазь ёмла геройхнень стамкс, кодамкс синь эряйхть эряфса, эрь шинь тевса. Писательть Николай Голенковонь творчествасонза башка васта занцихть ёмлатненди лемтьф сценканза, пеетьфти азксонза. Лундан ляйть ваксса, кона шуди Зубово-Полянскяй районца, ули Булдыга веле. Тя велеса тёжянь вейхкса сятт ведьгемонь кафксоце кизонь кемзисемгоце августста шачсь мокшень прозаиксь, драматургсь и поэтсь Николай Голенков. Ленинградскяй государственнай университетонь журналистикань факультетть аделамда меле кота кизот работась «Мокшень правда» газетаса, лама киза покодсь «Якстерь тяштеня» идень журналса. Николай Голенков лама киза ульсь Мордовиянь Писателень Союзть оцюнять полафтыкс. Тяниень пингть сон сембе пингонц казендсы книгань нолдамань тевти. Нят и школаса тонафнихненди эрь кодама учебнай пособият, валкскт и дневникт. Писательть улихть арьсеманза – нолдамс кой-кона драматургическяй произведениянзон. Ули надияма, маластонь пингть ня книгатне пачкодихть ёмла лувихненди и синь тядяснонды-аляснонды.