Федеральной Советсэ Мордовия республикань читне! (ЭРЗЯ)
Неть читнестэ Федеральной Собраниянь Федерациянь Советсэ ютыть Мордовия Республикань читне. Конатнень лувсо Федерациянь Советэнь прявтось Валентина Матвиенко ютавтсь вастовома Мордовиянь прявтонть Владимир Волковонь марто. Кортазельть республикань социально-экономической касомань кевкстематне. Вастовомасонть ульнесть Мордовиянь Госсобраниянь прявтось Владимир Чибиркин, сенаторт – парламентсэ республикань пельде предаставительть: Федерациянь Советэнь Комитетэнь раськеютконь тевтнень коряс прявтось Сергей Кисляк ды федеративной устройствань, региональной политикань, эсь таркасо самоуправлениянь ды Пелевеёндонь тевтнень коряс Федерациянь Советэнь Комитетэнь прявтонь полавтыцясь Владимир Литюшкин. Валентина Матвиенко ды Владимир Волков ванызь выставканть, конасонть невтезельть республикань промышленностьсэнть, велень хозяйствасо тевтопавтовкстнэ ды раськетнень мазычись. Республикань Прявтось ёвтнесь оптоэлектроникасо, светотехникасо, вагоностроениясо научно-производственной кластертнэнь касомадо. Мордовиянтень алтазель парламентэнь версе палатань пленарной промксось, конасонть кортась республикань прявтось Владимир Волков.
Мордовиянь Прявтось ёвтась сюкпрянь валт Валентина Матвиенко Федерациянь Советэнь Прявтонтень парламентэнь верце палатасо республикань тевтнень ванномаст кисэ. Покш тевтопавтовкс ютавтозель Федерациянь Советэнь профильной комитетэнь заседаниятнесэ. А республикань арсематне кармить кирдевеме мельсэ Федерациянь Советэнь «Республикань социально-экономической кастомань государствань кирдемадо» постановлениянь анокстамосто.
Владимир Волков ёвтнесь меельце иетнень перть региононь касомадо ды топавтовкстнэде. Истя меельце 5 иетнень перть региононь валовой продуктась кайсь комсь кавтово целат колмо кеменце пелькс процентс, промышленностьсэнть производствань объемтнэ кайсть 20 %, велень хозяйствасо – 30 %. Республиканок –Россиянь келес инновационной продукциянь весе объемтнэсэ ашти васенце таркасо – те малав 29 %. Касовксось моли научно-производственной кластертнэсэ.
«Волоконная оптика и оптоэлектроника» инновационной кластэрэсь – масторонь келес те ёнкстнэсэ вейкине! Касыть-кепетить вагоностроениянь коряс, кабельной продукциянь, строительной материалонь кластертнэ. Тевс нолдавить силовой электроникань ды чипаень энергетикань коряс проектнэ. Саранонь «Биохимик» заводсонть панжозь Россиянь келес неень шкань антибиотикень циклань васенце производства.
Истяжо Республикань Прявтось ёвтнесь регионсонок агропромышленной комплекстэнть, социальной политикасо прявт лувтнэде. Валентина Матвиенко тешкстызе, республикасонок алкукс парт социально-экономической касовкстнэ. «Российской Федерациясо Мордовиясь – парсте касыця субьект, косо эрямос совавтовить масторонь келес прявт проектнэ» – тешкстызе Федерациянь Советэнь Прявтось. – «Саемга, антибиотикень теемась – те прявт проект, кона эряви весе масторонтень. Мордовиянть пельде ули мезень коряс тонавтнемс лия регионтнэнень».
Верце палатань спикерэсь тешкстызе стакачитнень, конатнень коряс эряви важодемс седеяк пек. Те демографиясь ды республикань государствантень апандоматне. Валентина Матвиенко тешкстызе, республикасонок эрямос совавтови кудораськетнень кирдемань коряс мелень саиця опыт. «Тень коряс ламо тееви, теке марто эрявить лияткак эскелькст, конат кепедевлизь бу демографиянть, лоткавтовлизь миграциянть» – тешкстызе спикерэсь. Теде башка Валентина Матвиенко кортась республикань госдолгтонть, конадонть кевкстеманть эряви ванкшномс башка. Сон мерсь – «ярмактне кучозельть Мордовияв прявт проектэнь топавтомас, секскак эряви путомс весе вийтнень, долгонть вишкалгавтомга ды региононь финансонь кемечинть кастомга».
Федерациянь Советэнь Прявтось ёвтась сюкпрянь валт паро важодемань кисэ региононь Прявтонтень, Мордовиянь эрицятненень. Арсесь од изнявкст ды паро эрямо. Сон кеми, Мордовиясь пек парсте ютавтсы футболонь коряс Масторонь чемпионатонть ды алтась самс минек регионс.