Федеральной теварсевкстнэ тевсэ (эрзя)
Россиянь Президентэнть ды важодемань министерстванть лезксэст вельде Мордовиясо виевгады социальной обслуживаниянь системась. Теде пачти соцсетьсэнзэ Артём Здунов Мордовия Республикань Прявтось. Региононь ветицянть Антон Котяков Россиянь важодемань ды социальной идемань министранть марто вастовомсто тешкстазель: вете иетнень перть «Старшее поколение» федеральной проектэнть тевс топавтомантень кучозель 2 миллиардто ламо целковойть. Те шкастонть одкстомтозельть Ковылкинань ды Краснослободской буетнесэ кудотне-интернаттнэ. Неень шкане малавгады прядовомас сыре ды лавшо шумбрачи марто ломантень туртов Ицялонь кудонть-интернатонть стявтомазо-кепетемазо, теке марто эль прядови Зубова Полянань буесэ Ширингуши велесэ ветеранонь туртов учреждениянь витнемась. Икелепелев путовкстнэнь ютксо — сыре ды лавшо шумбрачи марто ломантненень Саранонь кудонть-интернатонть реконструкциязо, Зубова Полянасо «Ясная Поляна» эйкакшонь туртов реабилитациянь кункшкакуронь теварсевксэнть прядомазо.