Эйзюрковонь 14-це чистэ топодсть 25 иеть эрзя-мокшонь раськень васенце Инекужонть ютавтома чистэнзэ. (ЭРЗЯ)
Се шкастонть саезь вете иес весть республикасонок кармасть ютавтневеме Инекужотне. Течис эйстэдест ульнесть кото. Васенце инекужонь ютавтомасо покш тарка сайсть «Масторава» ды «Вайгель» кужотне. Сонзэ анокстасть Мордовиянь Кирдивийтне ды Верховной советэсь. Весе Советской Союзстонть съездэв тердезельть 649 делегатт, конантнень эйстэ састь 628 ломанть Мордовиясто, Барнаульской, Нижегородской, Новосибирской, Челябинской ды лия областнестэ ды регионтнэстэ. Весе тердезентень марто Профсоюзонь Дворецсэнть пуромсть 1200 ломанть. Путозь кевкстематнень ютксо васенце таркасо аштесть эрзянь, мокшонь раськетнень мелест кепетемась. Нама, ваннозельть зярыя лияткак, конатне комсь вете иетнень перть топавтовсть эли топавтовить тевс. Инекужосонть кепедезь кевкстематнень коряс, кемекстазель Инекужонь конституциясь, Инекужонь декларациясь ды резолюциясь. Весемезэ кемекстазельть кемень документт. Сестэ арсезель эрзянь ды мокшонь кельтненень максомс государственной статус, ансяк сеск те эзь топавтово, мекс целанек Мордовиясо мольсть ламо полавтомат. Эсензэ пензэ те кевкстемась муизе ансяк 1998 иень чадыковсто, Государственной Собраниясь кемекстызе «МР-нь государственной кельтнень коряс закононть». Тень эйстэ ушодовсь республикань школатнесэ эрзянь ды мокшонь кельтнень седе домка тонавтомась. Весе изнявкстнэнь лангс апак вано ламо кевсктемат, конат путозельть васенце Инекужосонть те шкас апак топавто. Сынь кепедевить эрьва Съездсэнть ды сынст эрямос совавтомась моли стакасто. Тувталось — а весе эрзятне-мокшотне чарькодить эсест виест, эсест покш смустест те эрямосонть.
<iframe width=»560″ height=»315″ src=»https://www.youtube.com/embed/WGT7OdTneBs?rel=0&showinfo=0″ frameborder=»0″ allowfullscreen></iframe>