Эйкакштнэнь кизэнь оймсемадост (ЭРЗЯ)
Эрьва кизэ ламо эйкакшонь триця ды нужачисэ эриця кудораськетненень максовить Мордовиянь ды Краснодаронь лагерьтнес питневтеме путевкат. Неень шкане Пролетарской буень социальной куншкакуронтень максозь колмосядт заявкат, Людмила Вельдякинань валонзо коряс, ютазь иестэнть те цифрась ульнесь седе вишкине, тень лангс апак вано, арсеви, што весенень карми максозь лезкс ды эрьва эйкакшось моли оймсеме. Тешкстама, кизэнь перть эйкаштнэ оймсить аволь ансяк республикань лагерьтнесэ, зярыя сменат оймсить иневедь чиресэ. Наталья Котельникова вете эйкашонь ава, 2017-це иестэ сонензэ максозель ламо эйкашонь триця авань колмоце степенень почётной дипломось. Авась видьксты, Пролетарской буень социальной лезксэнь максомань куншкакурось эрьва ие тонавтнема иень ушодомадо, Инечиде икеле яви ярмакт ды те аволь весе социальной лезксэнь максомань мератане. 2018-це иень эйкакшонь кизэнь оймсемань кампаниянтень Мордовиясо ульнесь явозь малав 253 миллионт целковойть. Целанек республикасонть роботыть 399 санаторийть ды лагерть.