Эйкакшонь ванстома чистэнть Атяшевасо панжозель налксемань од площадка. (ЭРЗЯ)
Раськеютконь покшчись пры ве лувс кизэнь ушодксонть ды каникулатнень марто. Келейстэ сонзэ тешкстызь аволь ансяк Саранскойсэ, но и республикань районтнэсэ. Атяшевасо вишка эрицятнень туртов анокстасть казне — панжсть эйкакшонь налксемань од площадка. Теде башка весе эрицятнень туртов невтезель концерт. Сехте покш казнекс Атяшевань вишка эрицятнень ды сынст тетяст — аваст туртов кармась перть — пельксэсь. Райцентрань куншка курось пешксель ломанде, конат састь тезэнь покшчинь тешкстамо. Теде башка те чистэнть посёлкасонть кармась вейке налксемань площадкадо седе ламо. Истямо казне эрицятненень тейсть Талина компаниянь партнёртнэ. Налксемань тарканть светизе Ардатовань ды Атяшевань Епископось. Владыкась баславинзе ломантнень, кортась прихожантнэнь марто, весенень ёвтась лембе валт те покшчинть кувалт. Покшчинть тешкстасть и раськень культурань ды ремёслань центранть вакссояк. Выставкасонть эсест шкинемаст невтизь райононь кедьчелькев ломантне. А посёлкань куншкакуросонть пурназель «Мой дом — моя семья» эйкакшонь артовксонь выставка. Сонзэ автортнэ тешкстазелеть шнамонь конёвсо, а изницятненень — ярмаконь казнеть. Эрьгелемачинь анокстыцятне ютавтызь сонзэ истя, штобу вейкеяк эйкакш илязо кадово мельтеме. Вишка артыцятне невтизь эсест ёрокчист асфальт лангсо, спортонь вечкицятненень истяжо анокстазель программа. Цёрынетне ды тейтернетне налксесть ёвксонь персонажтнэнь марто, конат макснесть сыненст кевкстемат. А те шкане сцена лангсо мольсь концерт, косо киштсть ды морасть райононь творческой коллективтне.