Эрзянь Найманось течи. (ЭРЗЯ)

Сон малав мейсэяк а явови республикань лия велетнень эйстэ. Ламотнень ладсо аламодо чами. Ютазь иестэ саезь пекставсь средней школаст. Тень лангс апак вано, икелень шкань велень эрицятне кармасть велявтомо тиринь ёнксос, одкстомтомо раськень эрямо таркаст. Покш Березник буень Эрзянь Найман веледе васенцеде ледстяви кемзисемгеце пингень документнэсэ. Велесь ульнесь удельной, зярдояк арасель крепостноекс, мекс ломантнеяк тесэ олячинь вечкицят. Историктнень валост коряс, велесь кеместэ сюлмазь Шугурованть марто, конань стявтызьгак Эрзянь Найманонь эрицятне. Тундонть самонзо марто тесэ весемесь лиякстоми. Велесь ашти Нирлейка леенть чиресэ. 1929-це иестэ тесэ пурназель «Од ки» колхозось, конань мейле лемдизь «Старонайманской» крестьянско-фермерской хозяйствакс. Ютазь пингень вейксэньгеменце иетнестэ велесь кармась чамомо – ламот тусть эрямо ошов. Ней тесэ сёрмадстозь 425 ломанть. Чарькодеви, эрицятнень эйстэ пелест – пенсионерт. Лиятне важодить птицефабрикасо ды шабрасо аштиця Марьяновка ды Починки велетнесэ.  Веленть лангс ванозь, сеске неяви, малав весе кудотне одкстомтовить. Сеть, кить таго зярдо каднызь кудост, ней кармасть велявтомо тиринь ёнксов. Кизна улить сыцят ошстояк. Те аволь ансяк эйкакшт, конат оймсить сырькаест кедьсэ, ошонь эрицятнеяк ламот чарькодизь – велесэ, виренть маласо лексемскак седе шожда. Стакачитнень лангс апак вано Эрзянь Найманонь культурань кудось а эрси чаво. Кавто этажтнэсэ кельгстявсть почта, ловномань кудо, ФАП, миема тарка. Лиякс меремс – ули весе, мезе эряви эрямонть туртов. Кинь улемась максы кемема сыця шканть лангс. Бути кармить кить – велесь карми эрямо, кармить тезэнь сыцят. Лия велетнень ды райцентранть марто ули сюлмавома, чизэнзэ нилексть велес совси автобус. Маласо шкасто арсеви одкстомтомс культурань кудонть.