Эрзянь, мокшонь вейсэндявксонь промкс (ЭРЗЯ)
Ванкшномс иень коряс цётамотнень, максомс питне ютавтозь важодемантень, аравтомс тевтопавтомат сы иес! Саранск ошсо ютась э\м раськень регионъютконь общественной вейсэндявксонь промкс. Ванстомс эрзянь, мокшонь кельтнень, культуранть, регионсонок эриця раськетнень ютксо ояксчинть ды чарькодеманть, невтемс республиканок топавтовкстнэнь Мордовиянь томбале! Неть путовкстнэ лововить прявтокс вейсэндявксонть икеле. Диаспоранть марто кеме сюлмавомань цётамотне- эрьва-кодат вастовомат, промкст, национальной культурань покшчить. «Шумбрат» фестивалесь, кона юты Ульяновскойсэ, Саратовасо, Москов ёнкссо ды лия регионга, кармась улеме вечкевиксэкс ламонь туртов. Седеяк покш смустезэ- ламо раськень ломантнень вейсэндямосо. 17-це иестэ сон юты Мордовиясо. Учови, те фестивалентень максови Весероссиянь статусось. Те меленть ды лия мельёвтамотнень кирдинзе Мордовиянь Прявтось Владимир Волков. Исполкомонь промкстнэ, конат ютасть кода Мордовиясо, истя и лия регионтнэва макссть покш лезкс таркасо ветявиця важодемасонть. Ожоковсто саезь республиканок школатнева ютавтовить патриотизмадо ды ломантнень вейсэндямодо урокт. Таштамковсто саезь университетэнь весе факультетнэсэ тонавтови э\м раськень эрямопингеде ды келень башкачиде курс. Юрий Мишанин тешксты, футболонь коряс малавгадыця чемпионатонтень пароль бу киртязь лувсо лекциятнень ютавтомс тонавтомань и лия учреждениятнева, волонтёртнэнь ды обслуживающей персоналонть туртов. Промксонь башка ды, натой, сех пшти кевкстемась — эрзянь, мокшонь кельтнень тонавтомадо! Бути Ульяновск ёнксось тень коряс ашти паро невтемапелекс, Татарстансо тевтне молить лавшосто. Кельтне тонавтовить ансяк малокомплектной школатнесэ. Саемга, Тетюшевской райононь Киртели велень школасо, этнокультурной компонентэнть тевс нолдазь, мокшонь келень тонавтомась ушодовсь 2000-це иестэ.
Ёвтама, теньсэяк ансяк таркасо важодиця школань прявтнэнь ды тонавтыцятнень путовксост. Пенза ёнксонь Э\м НКА-нь прявтось овсе а мари ломантнень пшкадемаст, кады мельтеме исполкомонь пельде кучовиця кевкстематнень. Невтемга, 3 иень перть Пензань образованиянь министерстванть пельде Мордовияв регионтнэва э\м кельсэ ярмактомо пачтявиця тонавтнемапельтнес ды методической литературас арасель вейкеяк сермадстома. Башка мель — тонавтнемапельтнень нолдамонтень. Тесэ вановтось явозель региононок образованиянь министерствантень. Промксонть лувсо кортазель национальной печатень изданиятнень сёрмадстомась, кона печти стакачить. Ванкшнозельть яволявтозь кевкстематнень витемань-кардамонь китне. Домкасто кортнезельть сы иес арсезь тевтне, конатнень ютксо М. Девятаевнень кеврунгонь аравтомась, содавикс ломанень юбилеень тешкстамось, регионга исполкомонь промксонь ютавтома ды ламо лия. «За межнациональное согласие» медальсэ казезь исполкомс совицятне. 10 ламо региононь представительтне, тердезь инжетне кемевтить, сы иестэ тиринь келень, культурань, ванстомга важодемась седеяк виевгады.