Эрзянь-мокшонь драмань театрасо анокстыть К. Абрамовонь «Эрьванть эсензэ ормазо» пьесанть коряс од спектакля. (В национальном драматическом театре готовятся поставить спектакль по пьесе К. Абрамова «У каждого своя болезнь») ЭРЗЯ

Ютазь иестэ МР-нь народной писателентень топодсть 100 иеть. Те спектаклясо режиссёртнэ ды актёртнэ арсить одс  невтемс ваныцянтень писателенть пьесатнень домкачист. Те спектаклянть эрзя-мокшонь театрасо путнизь 60-це ды 90-це иетнестэ. Ды сон пек вечкевсь ваныцятнень туртов. Эряви меремс, комедиятне свал вечкевить, а Кузьма Абрамовонь седеяк пек, мекс сёрмадсь сон алкуксонь эрямодо. Неень составсо налксицятнень ютксто ламот налксекшнесть те спектаклясо.

Спектаклянь путыцятне-театрань актёртнэ Галина Самаркина ды Андрей Анисимов. Кода карминек содамо текстсэнть арасть кодаткак полавтовкст. Ансяк режиссёртнэ невтить эйсэнзэ неень шканть. Тешкстасынек, спектаклясонть налксить малав весе актёртнэ.

Репетициясо улемсэ эсь сельмсэ неинек кода парсте ладить режиссёртнэ ды актёртнэ. Сынь чарькодить вейкест-вейкест валтомо. Эряви меремс, велень темась ошонь эрицятнень туртов ульнесь свал мелень саиця.