«Эрзянь литературась ды печатесь» тонавтнемапеленть лиссь 4-це пельксэсь. («Эрзянская литература и печать» учебное пособие 4 часть) ЭРЗЯ

Масторсонок литературань васенце альманахось лиссь 18-це пингестэ. 1820-це-30-це иетнень ушодовомсто Россиясо лиснесть эрьва иестэ малав 20 альманахт, мезень коряс рузонь литературань се шкась лемдезель «альманахонь пингекс». Мордовиясо 20-це пингень 40-це-50-це иетнестэ нолдневсть «Литературная Мордовия», «Сяськома» ды «Изнямо» пусмотне. Васенцеде сынденст домка информация муеви од тонавтнемапельсэ, кона лиссь неть читнестэ «Эрзянь литературась ды печатесь» проектэнть лувсо. «Эрзянь литературань ды печатень» эрямопингеде тиринь кельсэ тонавтнемапелень сериянь нолдамось ушодовсь 2013-це иестэ. Васенце пелькссэнть автортнэ домкасто ванкшнызь тиринь литературанок ды журналистиканть чачомань юрост, васенце эскельксэст. 2-це пелькссэнть, кона лиссь 2014-це иестэ, ёвтневи эрзянь печатенть ды литературанть ютксо сюлмавкстнэнь ладявомадост «Сятко» журналонь лопатнень лангсо Ине Отечественной войнадо икеле. Ютазь иестэ нолдазь колмоце пелькссэнть – сюпав, лия ёнов а молиця материал репрессировазь сёрмадейтнень эрямодост ды шкинемадост. Меельце пусмосонть ванкшновить литературасо изнявкстнэ  войнадо мейле 10 иетнень перть. Материалонь седе покш пельксэсь те тонавтнемапельсэнть максови васенцеде! Чарькодеви, неть пусмотне кармасть улеме покш муевксэкс эрзянь литературань вечкицятненень ды тонавтницятненень.  Ёвтама, тонавтнемапелень те сериясь уш совась тиринь литературанок касомадо-кепетемадо эрямопингень лопатнес. Ацирьгавты, тиражось ансяк 100 экземплярт. Паро улевель, бути неть пусмотне понговольть национальной школатнес, конатнесэ, содазь, течинь чис улить стакачить  литературань коряс материалонть асатоманзо марто. Сюпав информациянть марто покш мельсэ содавтано миньгак. Тонавтнемапелень васенце экземплярось казнекс – минек съёмочной группанть туртов!