«Эрзянь литературась ды печатесь» тонавтнемапелень сериясонть нолдазь 3 пельксэсь, кона алтави репрессировазь сёрмадейтненень ды журналистнэнень. (В серии учебных пособий «Эрзянская литература и печать » издана 3 часть, которая посвящена творчеству репрессированных писателей и журналистов) ЭРЗЯ
Эрзянь литературась ды печатесь — Мордовиянь ды Россиянь раськетнень культурань аявовикс пелькс! Те темась кармась улеме важодемань прявт лувокс эрзянь кельсэ тонавтнемапелень сериянть анокстамсто. Сынст автортнэ- филологиянь наукань докторось, профессорось Василий Дёмин ды Н.П. Огарев лемсэ МГУ-нь филологиянь факультетэнь финнэнь-угрань литературань кафедрань прявтось Юрий Антонов. Чарькодеви, истямо покш тевень ушодомадо икеле топавтозель покштояк покш важодема. Ламо шкань перть масторонок архивтнесэ, библиотекатнесэ информациянь вешнезь, пурназель сюпав материал ютазь пингень эрзянь содавикс ды аволь пек содавикс сермадейтнень, журналистнэнь шкинемаст коряс. Ней весе те домка, мельстуця факттнэнь марто весе бажицятне содавтовить анокстазь тонавтнемапельтнесэ. Неть читнестэ «Эрзянь литературась ды печатесь» тонавтнемапелень сериясо лиссь колмоце пельксэсь! Сон алтави репрессировазь сёрмадыцятнень эрямонтень ды шкинемантень. Кода яволявтыть автортнэ, те книганть — эсензэ башкачинзэ. Материалонь покш пельксэсь ловныцятнень туртов максови васенцеде!
Кавтолдомавтомо ёвтама, неть тонавтнемапельтне улевельть паро лездамопелекс школасо тиринь литературань тонавтыцятнень туртов. Ансяк тесэ ули стакачи: тиражось вишкине, весемезэ 100 экзэмплярт. Автортнэнь валост коряс, материалось таштазь ламо, секскак ули кемема, маласо шкасто анокстави тонавтнемапелень 4це пельксэсь, кона арсемга карми алтавомо раськенек литературно-художественной изданиятненень.