Эрзянь ды мокшонь кельсэ тотальной диктант. (Тотальный диктант на эрзя и мокша языках) ЭРЗЯ
Тиринь келень чинь тешкстамодонть икеле, чадыковонь 15-це чистэ прявтошсонок ютавтовсь эрзянь ды мокшонь кельсэ тотальной диктант. Парта экшс озакшность чиновникть, тонавтницят, студентт. Весемезэ малав 300 ломанть. Ёвтама, Мордовиядо башка тедиде тиринь кельсэ диктант сермадсть Россиянь 12 регионсо. Диктантось ютавтовсь М.Е.Евсевьев лемсэ педагогической институтсонть. Образовательной акциясь мольсь кавто аудиториява вейкесэнть сёрмадсть эрзят, омбоцесэнть – мокшот. Саран ошонь мэрэсь Пётр Тултаев истя жо озась парта экшс. Самай сон васенцекс ёвтызе меленть ютавтомс «Тотальной диктантонть» эрзянь ды мокшонь кельсэ. Сёрмадомс кочказель Ине скульпторонть Степан Эрзя ланга текстэсь. Эрзятнень туртов сонзэ ловнось филологиянь наукань кандидатось, эрзянь ды мокшонь келень кафедрань прявтось Иван Рябов. Сёрмадыцятне тешкстыть-текстэсь аволь пек стака, но ялатеке таркань-таркань ульнесть кавтолдомат. Кенярдовты, сёрмадыцятнень ламочись иеде иес касы. Ломантнень ули мелест кемекстамс тиринь келень коряс содамочитнень. 19-це номер гимназиянь тиринь келень тонавтыцясь Зинаида Тикшаева содасы келенть пек парсте, но сон ялатеке сась содамочинзэ ванномо. Тешкстаса, диктантонь коряс цётамотне течинь чистэ саезь невтевить Рав кужонь финнэнь-угрань раськень культурань куронь сайтсэнть. Оймсема читнестэ тотальной диктантонть сёрмадсь и рузонь кельсэяк. Минек регионсо сон сёрмадови колмоцеде. Мелесь ютавтомс те образовательной акциянть сась Новосибирскоень кельсодыйтнень туртов ды 2004 иестэнть диктанось сёрмадовсь васенцеде. Диктантонть авторокс кармась содавикс режиссерось, писателесь Андрей Усачёв. Текстэсь ульнесь аволь пек покш, малав колмосядт валт.