«Эряк тиринь кель» этнокультурной лагересь курок ушодсы роботанзо. (ЭРЗЯ)
«Сивинь» эйкакшонь шумбрачинь витемань лагерьсэнть коень коряс эрьва ие ютавтови тематической смена. «Эряк тиринь кель» этнокультурной лагересь те иестэнть панжсынзе кенкшензэ аштемковонь 6-це чистэ. Этнолагересь важоди 2003-це иестэнть саезь. Сонзэ пурны МР-нь Образованиянь министерствась. Тей тердевить эрзянь, мокшонь ды татаронь раськень эйкакшт. Ансяк аволь весе. Сетне, кить пелькстасть ды изнясть тиринь келень регионъютконь ды республикань олимпиадатнесэ, кить морсить фольклоронь коллективсэ. Истяжо тесэ паро мельсэ вастыть республикань томбальде сазь эйкакштнэнь.
Тедиде лагерентень сыть оймсеме 100 эйкакшт. Эрьва иестэ этнолагерьсэнть ютавтови покш программа. Эйкакштнэнень ютавтовить мастер-класст, творческой лабораторият, тиринь келень коряс налксемат. Тонавтницятне анокстыть тиринь келень, культурань коряс исследовательской важодемат.