Экологиянь иентень! (ЭРЗЯ)
Пертьпельксэнь ваньксчиденть ашти весемесь, сонтемензэ а ванстови ломаненть эрямозо. А стяко 2017 иесь лемдязель Экологиянь иекс. Вирень питнечинть лесничествасо важодицятне ванстыть свал. Поладсызь те тевенть Экологиянь иестэнтькак. Саранскоень территориянь лесничествань прявт вирень ванстыцясь Юрий Чикнайкин кемевтимизь, што те иестэнть кармить ютавтозь ламо мероприятият. Тень туртов сёрмадстозельть зярыя соглашеният, конатнеде пачтязь райононь весе администрациятненень. Тундосто саезь сёксенть самс вирень ванстыцятнень лангс путови покш тев – пожартнэнь а нолдамось ды кирвазематнень каршо бороцямось. Те аволь ансяк эрицятнень мельга ваномась, штобу сынь топавтовольть вирьсэ улемстэ пожаронь а нолдамонь вешематнень, истяжо виртнесэ профилактикань мероприятиятнень ютавтомаськак. Ламо чувтт прыть вармадо, ормадо. Ормань седе тов а нолдамодо, сынст эряви ускомс вирьстэ. Теде башка кармить ванськавтомо виртнень коське чувттнэде-куракштнеде, парсте кирдеме китнень, ведень саемань таркатнень, сокамо просекатнень, понгавтнеме пожаронь а нолдамонь тешкстнэнь ды невтевкстнэнь. Те иестэнть арсеви путомс оймсемань туртов колмо од таркат. Тень лангс ярмактне явозельть госконтрактонть вельде. Оймсемань таркатнень мельга ванномась топавтови школасо тонавтницятнень марто.