Диаспораста абитуриенттне ерайхть тонафнемс Мордовияса (Абитуриенты из диаспоры хотят учиться в Мордовии) МОКША

Ня шитнень республикань высшай тонафнемань заведениятнень видеса молихть приемнай кампаниятне. Азома и ся, што, тяфтама специальносттненди, кода «Журналистика», «Архитектура», «Дизайн архитектурной среды», «Дизайн», «Народная художественная культура», «Искусство народного пения» документтнень примамасна аделавсь ни. Тяни абитуриенттненди эряви максомс творческяй экзаметт.
Минь республиканьке мекольдень кизотнень няфни кепотькс лия региоттненди лама вастова. Сяс и ширезонк ерайхть самс эряма и тонафнема од семьят и од ломаттне лия аймакнень эзда. Тячиень шити университетонь приемнай комиссияв инь лама заявленияда максф инженернай специальносттненди. Оттне документснон усксазь тяза и синць, а тяда башка кучсесазь интернетть вельде. Кода азозе МР-нь национальнай политикань коряс министрть васенце полафтыец Александр Карьгин, тядде МГУ-са ерайхть тонафнемс од ломаттне Россиянь 40-да лама аймакста: Москуста, Якутияста, Тамбовста, Удмуртияста и лия вастста. И ламотне эздост максозь документснон оригиналснон.
Кенярьфти ся, што оттне, самок тяза тонафнема, ляткшнихть республиказонк и сяда тов. Синь мушендсазь ширесонк павазснон, лисендихть рьвакс, рьвяйсихть, покодихть эрь кодама вастова. Огаревонь лемса университету лия аймаконь од ломаттне сашендыхть аф стак – тяса синь кочкайхть крхка содамошит, а общежитиятнень эса условиятне тячиень шить малат европейскяйхненди.
Диаспораста саф од ломаттнень мархта МГУ-нь приемнай комиссияса покоди Татьяна Польдяевась. Сон пачфтезе тейнек, што кда етай кизоть Мордовияса ерасть тонафнемс од ломатть Россиянь 39 аймакста, то тядде – 43. Оттне сяда сидеста кочкасазь инженернай специальносттнень. Ламотне ерайхть тонафнемс аграрнай институтса.
Ся тевса, што ширезонк сашендыхть тонафнема лия аймаконь од ломаттне, оцю лезкссна диаспораса покоди национально-культурнай автономиятнень. Синь вятихть оцю профориентационнай работа эсь аймаксост. Лиякс азомс, Мордовиять престижец касы кизоста –кизос. И пяк пара, што ширеса эряй мокшэрзятне ёрайхть мрдамс меки историческяй родиназост, эрямс тяса, лездомс вельмофтемс и вихонзафтомс народснон культураснон. Пара, што тя ломаттнень оцю лувкссна-канневи од поколенияти.