День молодёжи в Мордовии
Россиять келес ётась шись, кона лемтьф оттненди. Ломанть эряфса тя инь цебярь и мазы пингсь. Мзярда кажнайсь ащи вешендемань ки лангса. Од ломаттне сай пингоньке и синь тячи няфнесазь пряснон, эсь маштомашиснон эряфонь сембе ширетнень эса. Саранск ошень сембе райоттнень эса пуропневсть илат. Мезе няйсь корреспондентоньке Татьяна Михалкинась? — азонды эсь сюжетсонза. 27 июньць Россияса лемтьф Од ломанень шикс. Сонць праздниксь стама жа од, кода сятне, кинди сон лемтьф. Етафнемонза официально ушедсть 1993-це кизоста сявомок. Виденцяма, советскяй властть пингстовок ульсь тяфтама ила и етафневсь сон июнень мекольце недляшиня. Тя шиня фалу уленди лама эрь кодама илада, конатнень пингста няфнесазь маштомашиснон од ломаттне.
Республикасонк од ломаттне цебярь ширде няфнесазь пряснон эрь кодама вастса. Синь арсихть сяськикс кода школьнай олимпиадатнень, стане и международнай пялькстоматнень эса. Тяда башка, минь республикасонк стирьхне и цератне аськоляйхть тячиень шить мархта ряцок — синь оцюдонга-оцю мяль шарфхнить инновационнай технологиятнень лангс.Од ломанень шиня Саранскяйса етафтовсь лама эрь кодама ила Пушкинонь лемса паркса, 1000 кизонь илати лемтьф площадьса. Тяса етафневсть эрь кодама пялькстомат, оттне кштисть и морасть марса сембе Россиять мархта. Тяфта минь республиканьке странаньконь лия аймаконзон мархта ряцок етафтозе «Позитив» музыкальнай флешмобть. 27 июньцта ламоц од ломаттне, конатне путсть аф кржа вийда Сочиса тялонь олимпиадать и паралипиадать анокламаснонды и етафтомаснонды, казьфтольхть медальса и Грамотаса Россиянь Президентть эзда. Оцю путфкссна оттнень и Сяськомань шиста 70- кизонь юбилейть етафтомаса. Сятненди, кит ульсть волонтеркс, кие аноклась и етафтсть аф кржа илада 9 майда инголе, максфтольхть сюконямань сермат Мордовиянь од ломаттнень тевснон коряс госкомитетть эзда.