Даволковонть перть манчезельть Мордовиянь 100 ломанть (эрзя)
Даволковонть перть Мордовиянь внутренней тевень органтнэс ярмаконь саламодо яволявтома марто пшкадсть 100 эрицят, конатнень кедьстэ манязельть малав 34 миллионт целковойть.
Кода икелеяк сех вастневиця саламотнень ютксо кадови ярмаконь каямонь лоткавтомга ванстомась ды ярмактнень резервень эли зыянтомо счёттнэс ютавтомась. Истямо лувсо зыянс 33 понгозетне ёмавтсть 20 миллиондо ламо целковойть.
Эряви тешкстамс, яволявтыцятнень ютксто ламотне бюджетэнь сферасо важодицят ды студентт.
6 миллиондо 800 тёжадо ламо целковойть манчицятненень массть 23 эрицят, конат арсесть саемс ламо ярмакт электронной микшнематнесэ эли вешнесть важодема. 1 миллион целковой ютавтсть асодавикстнэнень 6 эрицят, арсесть лездамс зыянс понгозь раськетненень, конат «теевсть» авариянь чумокс.
Малав 2 миллионт 500 тёжат целковойть ёмавтсть 29 ломанть, конат арсесть рамамс эли миемс улипарот питневтеме яволявтомань сайтсэ, социальной сеттнесэ, маркетплейсэнь содавикс платформасо. Мордовия Республикава МВД-сь ледсти эрицятненень: бути тыненк гайневтить ломанть ды яволявтыть пряст банконь эли полициянь важодицякс – гайневтеде финансонь организациянь ды правоохранительной органонь официальной номертнэва.
Илядо ютавтне икелепелев ярмакт товаронть кис, ды илядо ёвтне киненьгак банконь картатнень весе реквизиттнэнь, PIN-кодонть, CVC/CVV-кодтнэнь ды операциянь кемекстамга веенькирдань парольтнень.
Тыненк ярмаконь ютавтомга эряви ансяк банконь картань номерэсь!