«Бессмертный полк» акциясь Саранскойсэ. (Акция «Бессмертный полк» в Саранске) ЭРЗЯ

Панжиковонь 9-це чистэ Саранскойсэ «Бессмертный полк» акциясо ульнесть 25 тёжадо ламо ломанть. Целанек жо Мордовиясо те полксо ютасть малав 50 тёжат. Колоннанть икеле кандыть Изнямонь Знамянть. Те символонть мельга ютыть сеть, кинь эрямосо Ине войнась кадсь тешкс. Мордовиянь прявтось ютась тетянзо портретэнзэ марто. Вакссонзо Василий Пискарёв генералось, конась васенцеде ютась Изнямонь Парадсо Саранскойсэ. Мордовиянь поисковиктнень прявтось Николай Кручинкин сась нуцьканзо марто. Кода и лия оштнэсэ колоннась сыргась 15 чассо. Ютыцятнень ютксо вооруженной силань ветеранось Юрий Калямин, гармонистэсь, «Синяя птица» Весероссиянь пелькстамонь лауреатось Влад Шумкин аванзо марто. Тесэ жо «Тетянь-авань национальной ассоциациянь» прявтось Екатерина Сыщикова кавто эйкакшонзо марто. Эсест ветерантнэнь портретэст марто ютасть Мордовиянь народной артистэсь Николай Большаков, Россиянь ракетно-космической отраслень заслуженной роботникесь Алексей Авдюшкин ды лият. «Бессмертный полк» акциясь Саранскойсэ васенцеде ютась кавто иеде теде икеле, сестэ пурнась 150 ломанть. Те иень акциясо ютыцятне лоткасть «Свал палыця толонть» вакссо, тесэ лецтизь Ине войнасо чавовозтнень.