Башкортостанонь 10 школаса тонафневихть мокшень и эрзянь кяльхне (В 10 школах Башкортостана изучаются мордовские языки) МОКША

Содаф, мокшень и эрзянь кяльхне тонафневихть аф аньцек республикасонк, но и диаспорасовок. Башкортостанць канневи ся аймакнень лувксс, коса эрь национальностть эсь лацонь шинц кородозь ванфтсазь, тиендьсазь семботь, штоба тоса эряй, кепотьксонди, мокшетне и эрзятне афолезь юкста атяснон-бабаснон кяльснон, койснон и обуцяснон. Тона ширень школатнень эса тонафневихть минь кяленьке. Оцю путфкссна тя тевса тоса кочкаф мокшэрзянь национально-культурнай центраса покодихнень.
И виденцяма, тячиень шить Башкортостанць – фкясь ся аймакнень эзда, коса мокшень и эрзянь кяльхне тонафневихть эрявикс уровеньца. Тостонь шабатне кочксесазь ся кяльть, конаса корхтайхть тядясна-алясна. Тона аймаконь аньцек фкя школаса тонафневи мокшеннесь – Федоровскяй райононь Кузьминовка велеса, лия вастова 2-3 недяляти вятеви эрзянь кяльсь. Башкортостанонь школатнень эса покоди мокшень и эрзянь кялень сембе тонафтыхне аделазь Стерлитамакскяй педагогическяй колледжть. 10 учительхнень эзда колмотнень ули высшай образованиясна. Синь тиендьсазь семботь, штоба иттне кельголезь родной кяльхнень.
Мекольце переписсь няфтезе, што Мордовияса эряй 40 % сембе мокшэрзятнень эзда. Башкортостанца – комсь тежяньда лама мокшень и эрзянь ломаньда. Афкукс, оцю лезкс национальнай культурать мархта сотф тефнень пяшкодемаса тейст максы Мордовиясь.
Башкортостанца аф аньцек школатнень эса кяльхнень тонафнемаснонды шарфневи оцю мяль. 2004-це кизоста сявомок тона аймакса етафневи «Чи» кялень идень лагерь. Кизонь каникулатнень пингста иттне тонафнесазь мокшень и эрзянь кяльхнень, народоньконь историянц и культуранц.