Артём Водясов кармась сырнень призёрокс 15-це «Дельфийской налксематнесэ». (Артём Водясов стал обладателем золотой медали в 15-х «Дельфийских играх») ЭРЗЯ

Тюменьсэ ютасть Россиянь од ломанень 15-це «Дельфийской налксематне». Мордовиянть тосо невтсть 9 ломанть. Вирь Тавлань чувтосто ды сёвоньстэ налкшкень тейнемань экспериментальной эйкакшонь художественной школань тонавтницясь Артём Водясов те пелькстамосо лиссь изницякс. Те художественной школасонть тонавтнить 13 эйкакшт. Эрьвась эсензэ ладсо ёроков. Артём Водясов кармась васенцекс, кие изнясь «Дельфийской налксематнесэ». Тонавтыцянзо, Евгений Мироновонь валонзо коряс, Тюменев сынь эзть арсеяк киньгак лиянь кучомс, мекс Артём ковдо теде икеле лиссь изницякс республиканской пелькстамосо. Артёмонь семиясо чувто ланга керсить весе цёратне: тетязо, лелязо те тевентень явить покш мель. А сонсь изницясь керсеме тонавтнеме кармась вете иестэ саезь. Ды зярдояк эзь янксе, мекс пурнызе те кинть. «Народные художественные промыслы и ремёсла» номинациясо ульнесть сисем пелькстыцят. Чувто марто роботасть кавто ломанть. Темадо икелепелев кияк эзь сода, ансяк пелькстамонь чистэ ёвтызь, што невтеме кармить Тиринь Масторонть. Од ломаненть роботанзо аволь весть ульнесть республиканской ды зональной выставкатнесэ. А те сырнень медалесь сонзэ туртов покш изнявкс. Изнямось художественной школанть туртов ещё вейке невтевкс, кона корты тонавтнемань тарканть эрявиксчиденть.