Анокстави од невтема (эрзя)
Эйзюрковонь 14-це чистэ Мордовиянь республикань С.Д. Эрьзя лемсэ изобразительной искусствань музеень прявт кудосо панжови «Россия – Китай. Волшебные краски дружбы» невтемась. Анокставсь сон Россиянь ды Китаень культурань Иетнень лувсо, конатнень яволявтынзе Россиянь Президентэсь. Экспозициясь алтави Россиянь Федерациянть ды Китаень Раськень Республиканть лувсо дипломатической тевветямотнень 75 иетненень. Саранонь эрицятне ды инжетне несызь Китаень гохуа коень живописень техникатнесэ ды ёнкстнэсэ теезь 38 произведениятнень. Тень пингстэ автортнэ – Россиянь артыцятне. Весе сынь – Китаень живописень вечкицянь пелькстамонь изницят ды пелькстыцят. Шкинемань пелькстамонь изницятнень каземань покшчись ютась 2023-це иень ацамковонь 8-це чистэ. Сех вадрятнень кочкизь Китаень Живописень Раськень Академиянь представительтне. Изнямонь кенярксонь изницятненень лембе валт ёвтась Россиясо Китаень Посолось Чжан Ханьхуэй.
«Сынст важодемаст явовить эрьва кодамо тематикасо ды уликсчисэ, мельс туиця эстетикасо, ёроков техникасо. Произведениятнесэ мукшновить художествань вардя ёнкссось ды Китаень культурань домка чарькодемась. Китаенть ды Россиянть кезэрень историяст ды сюпав культураст. Кезэрень шкатнестэ истя лиссь, минек государстватнень раськетне культурань прявт топавкстнэнь сайнезь, тонавтнесть вейкест вейкест кедьстэ», — тешкстызь С.Д. Эрьзя лемсэ музейсэ.
Невтемась карми важодеме чадыковонь 5-це чис.