Анокстави од невтема (эрзя)
Панжиковонь 24-це чистэ 15 чассто И.Д. Воронин лемсэ Мордовиянь республикань вейсэндязь краеведениянь музеень лекциянь нупальсэ юты Николай Рябовонь Мордовия Республикань заслуженной артыцянь «Двадцать сюжетов одной картины» персональной невтемань панжомась. Прявт экспонатокс тееви «Смутное время. Саранск 1774 год» сюжетэнь артовксось, кона алтави шкантень, зярдо Емельян Пугачев эсензэ ушмонть марто сась Саранов ды вастозель ошонь эрицятнесэ. Артовкссо невтеви найманонь куншкакуро, ламо эрицят, Спасонь соборось ды кудонь кузтемпесэ сонсь Емельян Пугачев.
Артовксонть поладсызь 20 важодемат, конат кандовить эскизтнэнень, этюдтнэнень ды сонензэ артовкстнэнень. Невтемасонть истяжо невтевить Николай Рябовонь наукань важодевкстнэ, эрьва кодат нолдавкстнэ, конатнесэ иллюстрациякс нолдавсть художникенть артовкстнэ ды седе тов. Ледстясынек, Николай рябов – РФ-нь артыцянь Союзов совиця, историянь наукань кандидат, МР-нь Заслуженной артыця, республикань, региононь, Россиянь, Раськеютконь невтемасо улиця, наукань малав 30-нь важодемань сёрмадыця. Сонзэ шкинемань прявт невтемась – эрзятнень ды мокшотнень раськень культурань тевкадовксонтень пшкадема, истяжо эрзятнень ды мокшонтнень сюпав культурань художествань ды философиянь арсемантень бажамось.