Анокстатано панжиковонь 9-це чинтень. (Готовимся к 9 мая) ЭРЗЯ
Панжиковонь 9-це чистэ Саранск ошсо ютыть кенярксчинь мероприятият, конат алтавить Ине Изнямонь 71 иентень. Валске марто ошонь храмтнесэ юты Ине Отечественной войнасо маштовозтнень лемень кундамост. 10 чассо Свал палыця толонть вакссо юты «Поклонимся великим тем годам» митингесь, конась поладови МВД-нь, МЧС-нь, Саранской гарнизононь ды ошонь кадеттнэнь сводной полконь ютамосонть. Мемориальной калмонть лангсо Ине войнань ветерантнэ ды ошонь эрицятне путыть цецят Мордовиянь госпитальтнесэ ранатнеде кулозь солдаттнэнь ды офицертнэнь калмост лангс. Теске жо ютавтови церьковань панихида. Весе масторонть марто вейсэ республикась юты «Бессмертной полксонть». Акциясь ушодови Привокзальной куросонть, юты Изнямонь куншка курованть. Седе тов Мемориальной музеенть вакссо юты концерт. Ошонь куншка куросонть кармить полевой кухнят, фотовыставкат, патриотической акцият ды ламо лия мероприятият. Прядови чись кенярксчинь салютсо. Мероприятият истяжо кармить ютамо ошонь весе микрорайонтнэсэ ды Мордовиянь муниципальной районтнэсэ.