Шкинемань вастовома Анна Лёвинань юбилеентень! (ЭРЗЯ)
Леонтий Кирюков лемсэ мукальной училищасо ютась шкинемань вастовома МР-нь искусствань заслуженной деятеленть, хоронь дирижеронть, педагогонть Анна Левина марто. Сонзэ лемезэ сырнень буквасо сермадозь Мордовиянь музыкальной искусствас. 50-де ламо иеть Анна Левина алтась те тевентень. Вановтонзо ало кайсть тежат студент, конат важодить аволь ансяк минек республикасо. Шачсь сон Левжа велесэ, косо свалшкане явсть ламо мель моронтень. Паряк секс тосто листь ламо содавикс музыкант, конатнень ютксо и Анна Яковлевна Левина. 80 иень юбилеентень МР-нь культурань, национальной политикань, туризмань ды архивень тевень министерстванть пельде Анна Левина казезь «За межнациональное согласие» медальсэ. Анна Левина кирди мельсэнзэ весе тонавтницянзо. Сон ламо вий путсь Мордовиясо музыкань искусстванть виевгавтомантень ды тонавтомантень. Ёроков педагогось, дирижерось максь эрямо фольклоронь ламо коллективнень. Башка лопакс важодемасонзо ловови шкась, зярдо Анна Яковлевна ульнесь «Келу» фольклоронь ансамблянь прявтсо. Музыканень мельявицятнень туртов «музыкальной университетэкс» кармасть хоронь самодеятельной коллективтнесэ, конатнень ветясь Анна Левина, занятиятне. Покшчистэнть сех питней ды седеентень малавикс поздоровокс кармась Левжасто «Ару лихтибря» раськень фольклорной коллективень морось.