Алексей Маресьевонь шачема шистонза 100 кизонь топодемати. (К 100 — летию со дня рождения Алексея Маресьева). МОКША

Военнай и трудовой подвигонь мемориальнай музейса ётась «Подвиг лётчика» ила, кона лемтьфоль Алексей Маресьевонь, Советскяй Союзонь Геройть шачема шистонза сяда кизонь топодемати. Музеень и республиканскяй ветеранонь Советонь работникне анокласть выставка и азондсть илас сафненди геройть эряфонь и боевой кинц. Алексей Маресьев Великай Отечественнай войнань кизотнень воявась Северо-Западнай фронтса. Тёжянь вейхкса сятт нильгемонь омбоце кизоня Новгородскяй областень Валдайскяй районца сонь самолётонц прафтозь аеркс фашисттне. Кемгафксува ши лётчиксь лисендсь минцень войскатненди, улемок ранендаф. Аф ваномок сянь лангс, што кафцьке пильгонза керфтольхть, протез лангса Алексей Маресьев тись кафксогемонь кота боевой вылет, прафтсь кефкие врагонь самолёт. Тя подвигть колга писательсь Борис Полевой сёрмадсь «Повесть о настоящем человеке» произведения. Сяс и подвигонц колга кармасть содама марнек мирса. Саранск ошень колмогемонь омбоце школань тонафнихненди тя содаф воинть колга азондсть сят, кие нинге васьфнезе геройть и ульсь мархтонза содафокс. Шабатне оцю мяльса кулцхондсть сянь колга, кода ломанць ашезь макса пря сталмотненди и васьфтезе Сяськомань шить.