Агитбригадась морась ветераттненди. (Агитбригада пела ветеранам) МОКША
Сяськомань шити республикать келес лемтьфоль пяк лама мероприятияда. Сембе синь лятфнесть войнань стака кизотнень колга, Советскяй народть аф юкстави подвигонц квалма. И эрь вастса чествовандазь войнань ветераттнень, тылонь труженикнень. И тяфтама цебярь илатнень эзда аф ащихть ширеса Евсевьевонь лемса педагогическяй институтонь преподавательхне и студенттне. Саранск ошень фкя куронь куттнень пирьфса пуромсть сиренятне эсь идьснон, унокснон мархта. Учсть и кеняртькшнесть перьфпяльти. Бтя природаське аноклась тя валда праздникти. Педагогическяй институтонь тонафнихне эсь преподавательснон мархта тяфтама акцияс лисендихть эрь кизоня. «Васяльга» фольклорнай ансамбльста стирнятне наряжафт военнай формаса, эсь руководительснон Василий Родионовонь мархта тонафнесть войнань пингонь морот и казендезь ветераттненди. Илать пингста путерьгодсь пиземнясь, бта сонга лятфнесь войнаса шавф и кулоф сире солдаттнень колга. Но кивок: аф ёмлатне, аф эряфкшуфне ашесть эряскода кадомс эсь вастснон. Кулхцондсть сединь токай моротнень эса. Финцне морасть стирнятнень мархта, омбонцне нарнезь сельмоведьснон. Тяфтама илатнень вельде, васендакиге, ладявихть цебярь кис од поколениятне. Штоба синь сяда лама содальхть войнать колга, аф юкснелезь сире солдатнень, марнек народоньконь подвигонц. Иласа лятфтавсть тя аймакса эряй ветераттнень и тылонь труженикнень лемсна. Фольклорнай ансамблянь стирнятне и синь тонафтысна морода башка казсть сиренятненди ламбама казнет – оцю и мазы тортт. Тя кафтонь крда кепсезе мяльснон. Ламос мольсь концертсь кеняртькшнесть мазы илати, кулхцондсть мялень пети моротнень.