Абрамовонь ловномат. (ЭРЗЯ)
Ютазь иестэ саезь Кузьма Абрамовонь лемензэ ледстнемга арсезель ютавтнемс ловномат. Неть читнестэ Эрзянь Найман велесэ пурнавкшность сонзэ шкинемань вечкицятне. Пурнавозтнень ютксо ламот парсте содылизь раськень сёрмадыцянть, ледстизь сонзэ марто вастовоматнень.
Васенцетне ютасть Покш Березникень школасо, тедиде – Эрзянь Найман велесэ, косо чачсь содавикс сёрмадыцясь. Ловноматнень ютавтыцякс кармасть культурань, национальной политикань, туризмань ды архивень тевень министерствась, А.Пушкин лемсэ раськень ловномань кудось, сёрмадыцянь вейсэндявксось. Эрзянь Найман велень культурань кудось пешксель: велень эрицят, тонавтыцят, сеть, кить вечксызь раськень сёрмадыцянь шкинеманзо.
К.Абрамовонь произведениятне свалшкане ванновить ды тонавтовить Мордовиянь ВУЗтнэсэ. Теде кортасть МГУ-нь филологиянь факультетэнь тонавтницятне. А.Пушкин лемсэ раськень ловномань кудонь раськень ды краеведениянь литературань отделэнь прявтось Надежда Бочканова тейсь сёрмадыцянть произведениянзо коряс видео презентация. МР-нь заслуженной поэтэсь Геннадий Гребенцов ёвтнесь, кода вастневкшнесь Кузьма Григорьевичень марто. Содавикс сёрмадеесь ульнесь Геннадий Сергеевичень валморонь сёрмадомасо тонавтыцякс. Ловноматнесэ ульнесь Кузьма Григорьевичень цёразо – историкесь Владимир Абрамов, кона тейсь доклад сёрмадыцянть произведениятнесэ билингвизмадо. А минек съёмочной группантень ёвтнесь тетядонзо.
Буень прявтонь тевень топавтыцясь, Александр Ямашкин тейсь ловноматненень цётамот: велень ды целанек буень культурань эрямосонеть ловноматне саить покш тарка. Пурнавозтнень туртов невтезель концерт, косо сёрмадыцянть валмородонзо башка ульнесть морот, конатнень морызь «Найманочка», «Парынза» ансамблятне ды Ицялонь артистнэ.