40-де ламо иень перть Саранск ошонь эрицясь Н.Бершин мель яви велотуризмантень. (Более 40 лет житель Саранска Н.Бершин увлекается велотуризмом) ЭРЗЯ

Сядот тёжат вайгельбеть, Ярославль, Нижний Новгород, Иваново ды ламо лия ошт сонзэ туристической маршрутнэсэ улить свал. Ниленьгеменде ламо иеть Саранск ошонь эрицясь Николай Бершин мель яви велотуризмантень. Ещё вишка порасто саезь сонензэ савсь ламо ардомс велосипедсэ. Сеть шкатнестэ те ардомапелесь эйкакштнэнь туртов ульнесь сех паро ялгакс. А васенце бойкасто ардыця велосипедэнть сон рамизе ютазь пингень 80-нце иетнестэ. Ансяк куватьс ардомс эйсэнзэ эзь саво, мекс велосипедэнть салызь. Седе тов ульнесть ещё вете вадря ардолмапельть, конатнесэ ламо тёжат вайгельбеть ардсь сон Россиянь оштнэва. Велосезонось ушодови чадыковсто ды сеедьстэ те спортонь вечкицятне «ардыть» ловонь прамос. Васенце «покш молевксэнть» сон зярдояк а стувтсы. Ялганзо марто якасть Жигулёвской заповедникс. Теде мейле велосипедс озавтынзе аволь ансяк эйкакшонзо, нуцьканзояк те тевентень кармасть явомо ламо мель. Ансяк паро валсо лецтни ялганзо марто вастовоматнень. Сонзэ мель путомадо содыть аволь ансяк малавиксэнзэ. Коллеганзо умок тонадсть, што лембе читнень самонть марто, Николай Павлович важодема таркав сакшны ансяк велосипедсэ. Низэяк кирдизе ды тонадсь сонзэ ламо ялганзо марто велотуризмасо мель явомантень. Велосипедсэ ардомадо башка Николай Павлович вечксы  воллейболонть. Корты, од ломантненень эряви явомс спортонтень седе ламо мель. Кецтни, што меельце шкасто велотуризмас састь ламо од ломанть, конатнень ютксо улить тейтертькак. Нама, сынст эйстэ аволь пек ламо, конат яксить васоло кис. Теке марто истят улить.