29 августста Левжаса васенцеда етай «Кургоня» фестивальсь (29 августа в селе Левжа впервые пройдет фестиваль «Кургоня»)МОКША

Республикасонк васенцеда етафтови «Кургоня» мокшэрзянь культурань Межрегиональнай фестивальсь. Сон кармай улема 29 августста Рузаевскяй райононь Левжа велеса. Илась ушеды 10 частста. Кургоня – национальнай пяряка модамарь мархта, конац шары шить лангс. Республикань сембе райоттнень эзда сембода пяк сонь кельгсазь и сидеста пицесазь Рузаевскяй районца. Сяс и тя фестивальть лемдезь тяфта.
Тя фестивальсь васенцесь республикасонк, конац кармай лемтьф национальнай ярхцамбяльхненди. Иласа кармайхть мишендевома медь, марьхть, пяштть. Синь питнесна улихть сяда емлат лавканнетнень коряс. Фестивальса няфтевихть мокшэрзянь обряттне, содаматне. Кармай работама фотозона,коса сембе сафне вачкодевихть национальнай щамса-карямса.
Инжихне няйсазь, кодаптольхть инголи мокшетнень налхксемасна. Тя шиня Левжаса панжеви культурань кудсь, етай Рузаевскяй райононь модамарьста ярхцамбялень рецептонь книгать презентацияц. Фестивальть пингста кармай аноклаф инь оцю кургонясь – келец кармай улема метра пяле мархта.

Ширезонк сайхть Самарскяй, Пензенскяй, Ульяновскяй, Нижегородскяй аймаконь, Марий-Элонь, Крымонь творческяй коллектифне. Илада меле сембе инжихнень тердьсазь мокшень семьятнень эзга, штоба синь няелезь, кода эряйхть минь ломаненьке. Аделави фестивальсь этнодискотекаса. Азсаськ, Левжаса учсазь сембонь. Саранскяйста тоза пачкодеват 117-це и 119-це маршруткаса, а Рузаевкаста нолдавихть дополнительнай автобуст.