Урматнень каршес (мокша)
Республикаса ушедовсь гриппть каршес прививкань путнемась. Правительствать мархта пуромксса Мордовиянь Оцюнясь Артём Здунов лятфтазе кельмотнень самаснон инголе эсь пингстонза ётафтомс вакцинань профилактикать. Койс коре республикаса вируснай инфекциясь и гриппсь вишкомкшнихть октябрьста сявомок январти молемс. Пелькс, што фкя пингть гриппть и ОРВИ-ть мархта сай коронавируснай од инфекциясь, мезсь максы оцю сталмот марнек здравоохраненияти. Кода мярьгсь министрсь Олег Маркин, Мордовияв састь ни вакцинань 100 тёжянь дозат. Васендакиге августста прививкат тиемат иттненди, уликс урма мархта ломаттненди и сятненди, кинди 60-да лама кизот. «Прививкась эряви путомс августста-сентябрьста, штоба иммунитетсь кемоксталь эпидемиять самс», — пачфтезе министрсь. Ломаттне, конат покодихть, прививкат тифнихть работама вастса тевонь макссихнень лезксснон вельде. Республикань вятись сярьгядезень предприятиянь и организациянь оцюнятнень седи вакска маладомс сярядемать коряс кизефксненди и эсь пингстонза ётафтомс покодихнень иммунизацияснон.