«Сыця шкас тевкадовкс» невтема (эрзя)
«Россия» Раськень куншкакуросо «Сыця шкань теевемась» наукань-фантастикань Раськеютконь симпозиумонь панжомань чистэ ушодови «Сыця шкас тевкадовкс» невтема. Эйсэнзэ невтевить од артыцятнень — эрьва кодамо масторонь шкинемань вузонь прядыцятнень важодевкстнэ. Од ломанень художественной кортамотнень лангс нежедезь невтемась панжсы «Нежедтяно ютазенть лангс. Арсетяно сыця шкадо» тезистнэнь. Башка мель анокстыцятне явить од практикатненень искусствань истямо лувсонть, кода сайнс-арт, конасонть ломанесь ды неень шкань технологиятне лововить шкинемань тевень вейкетьксчинь участникекс.
Экспозициянь прявт зэмесь – сыця шкась кадови ломаненть мельга, бути ломантнень вийсэ ванстови шкинемантень ды арсемань лувонтень ёрокчинть. «Сыця шкас тевкадовкс» невтемань кураторокс карми Россиянь Федерациянь Президентэнть пингстэ культурань ды искусствань Советс совицясь, Санкт-Петербургонь Илья Репин лемсэ художествань Академиянь ректорось Семен Михайловский.
«Россия» Раськень куншкакурось, кода мон сонзэ неса, улевель, васняяк, паро таркакс кортамотненень, таркакс, косо мереви невтнемс ломанень уцяскатнень, пингетнень марто сюлмавозь, масторонь эрьва кодамо шкатнеде ёвтневиця покш ды аволь покш невтематнень», — икеле кортась Семен Михайловский.
Экспозициянь масторонь-ялгатнень эйстэ вейкекс тееви Китаесь. Китаень ёндо кураторокс карми Тяньцзинень мазый искусствань академиянь ректорось Цю Чжицзе. «Сыця шкань теевемась» Раськеютконь наукань-фантастикань симпозиумось юты сундерьковонь 4-це чистэ саезь 6-це чис ды карми «Россия» Раськень куншкакуронь васенце покшчикс. Симпозиумонь участникекс кармить содыйть ды ванныцят-тонавтницят, футурологт ды прогнозистт, сёрмадыцят-фантаст, кирдивиень органонь представительть. Сынь кортасызь кодамо кадовксос вети искусственной интеллектэнть сравтомась, кодамокс карми сыця шкань цифрань государствась, мейсэ ашти технологиятнень сравтомасонть коень питнечитнень зэмесь ды зярдо ломантненень мереви ушодомс лия чарытештнень лезэнь саеманть.