Саранск ошсо ютыть тиринь келень коряс олимпиадат (ЭРЗЯ)
Рузонь школасо тонавтницятнень туртов республикань олимпиада, национальной школань эйкакштнэнь туртов — регионъютконь олимпиада! 3 чис Мордовиянь прявтошось кармась улеме курокс, ков пурнавсть эрзянь, мокшонь келень ды литературань сех виев тонавтницятне ды сынст тонавтыцяст. Олимпиаданть ушодкссо — пшкадема весе пурнавозтненень. Васняяк, пелькстамонь ютавтыцятне арсить изнямс талноматнень ды парсте топавтомс важодеманть. Коень коряс, олимпиадась ютавтови Евсевьев лемсэ МГПИ-сэ. Тедиде содамочинь невтеме рузонь школатнестэ эрзянь, мокшонь келень тонавтницятнеде састь сядодо ламо — 3-це классто саезь 6-цес молемс. Ламот олимпиадасо аволь васенцеде, бажить седеяк кастомс эсь цётавксост. Пелькстамонтень анокстамотне мольсть зярыя шкань перть. Тонавтыцяст марто вейсэ эйкакштне мельс ледстнесть весе ютазь материалтнэнь, ловность литература, ванкшность стака кевкстематнень. Рузонь школатнесэ эрзянь, мокшонь кельтнень тонавтницятнень марто вейсэ регионъютконь олимпиадасо невтить содамочист национальной школань эйкакштнэяк. Кенярдовты, иеде иес пелькстыцятнень ламочись касы. Ёвтама, самай истямо тевушодомасто ламот эрямокисэ вечкевикс тевекс кочкить тиринь кель марто важодеманть. А те корты седе, келесь а ёми, раськесь карми эрямо.