Изнясь немецень келенть коряс (эрзя)
2024-це иень эйзюрковонь 29-це чистэ саезь чадыковонь 3-це чис Самара ошсо ютась немецень келень коряс весе Россиянь школань олимпиадань меельце эскельксэсь. Масторонок эрьва кодамо ужинетнестэ ёроков од ломантне пурнавсть вейсэ эсь содамочитнень невтемас ды ванномас.
Финалс ютасть масторонок весе ужинетнестэ 9-11-це классонь 250 тонавтницят. Чаунзань 1-це номер лицеень 8-це «А» классонь тонавтницясь Кристина Керн пелькстась олимпиадань меельце эскелькссэ. Васенце эскелькссэ ванновить немецень келень лексикань ды грамматикань содамочитне, немецень кельсэ сёрмадозь тексттнэнь анокстамонь маштомачись, мастордонть содамочитне, ютксост Германиянь культурань ды историянь коряс содамочитне. Омбоце эскелькссэ пелькстыцятненень эрявсь невтемс валсо ёвтазь кортамонь ёроконть, бойкасто топавтомс кортамонь путозь топавкстнэнь. Олимпиадань пелькстыцятне невтизь аволь ансяк келень коряс эсест содамочитнень, прянь кирдеманть, путозь бажамотнес апотамонть ды топодеманть.
Олимпиадань читне, конатнень пелькстыцятне ютавтызь Самарасо, ульнесть пек сюпавт, теке марто стакакс. Эйкакштненень анокстазельть эрьва кодат мероприятият, ютксост ошканть экскурсият, мастер-класст, театрас молемат. Те лездась олимпидань пелькстыцятненень саемс валдо мельс правкст. Пелькстамось макссь невтемс эсест содамочитнень, теевемс содавиксэкс вемельсэ арсицятнень марто, истяжо саемс питнев ёрокчи.