Чаунзань буень эрицясь кудоютконь чатс совамодо мейле ёмавтсь 1 миллион 700 тёжадо ламо целковойть (эрзя)
Умарьковонь 10-це чистэ Россиянь МВД-нь «Чамзинский» ММО-нь дежурной частев пшкадсь 78 иесэ пенсионеркась, кона пачтясь 1 миллион 765 тёжат целковоень саламодо.
Зыянс понгозенть валонзо коряс, медьковонь прядовомсто мессенджерсэ сонензэ сась пачтямо асодавиксэнть пельде тердема марто совамс кудонь чатс. Тень туртов эрявсь сёрмадомс смс-стэ код, теде мейле сонензэ састь пачтямот седе, што сон кармась манчицятнень кедьс понгозекс.
Тандадозь, авась гайневтсь пачтямосонть тешкстазь номерэнть коряс. Асодавиксэсь прянзо ёвтызе Росфинмониторингень важодицякс, пачтясь, зыянс понгозенть даннойтне понгсть манчицятненень. Седе тов кортамось поладовсь «ФСБ-нь важодицянть» марто. Манчицятнень кармавтомаст коряс, пенсиясо улицясьсаинзе ярмаконзо саинзе ды Саранскойсэ, ков сон ардсь таксисэ, банкоматтнэнь вельде, кавто пандомасо кучсь манчицятненень 1 миллион 300 тёжат целковойть. Финансонь операциянть ютавтомадо мейле манчицятне пачтясть авантень, сонзэ ули долкозо, конань истя жо эряви пандомс. Тень топавтомга сон сайсь эсензэ таштавкст ды вешсь ярмакт содавикстнэнь кедьстэ. Саезь 450 тёжадо ламо целковойтнень покшолмасо сон истя жо ютавтынзе манчицятненень.
Финансонь весе операциятнень топавтомадо мейле зыянс понгозесь гайневтсь племянницантень ды вешсь ярмаконь эштё пелькс. Раськесь мерсь тесэнь эрицянтень пшкадемс полицияв.
Мордовия республикава МВД-сь кармавты:
– Зярдояк илядо юта кавтолдыця ссылкатнева. Асодавикс ломантнень эли содавикстнэнь ды малавикстнэнь пельде ссылкатне, кинь аккаунтось яжаволь, сеедьстэ ветить фишингень сайттнэс банконь картатнень парольтнень ды даннойтнень саламга.
– Ваннынк информациянть. Бути тыненк гайневтить эли сёрмадыть банконть, полициянть эли «Госуслуги» порталонть пельде, илядо сова кортамос. Путынк трубканть ды тынсь гайневтеде организациянтень официальной телефононь номерэнть коряс, конась невтезь сынст сайтсэ.
– Банконь ды государственной учреждениянь важодицятне зярдояк а кармить энялдомо ютавтомс ярмактнень зыянтомо эли резервань счётс. Те манчицятнень манчемась тынк ярмаконк саламонть туртов.