«Армия 2024» военно-техническяй народъётконь форумсь (мокша)

Россиянь оборонань промышленностень инь од образецтне, военнай и специальнай техникась, вооружениясь, кона няфтезе эрявиксшинц тюремань паксятнень эса, и аф фкя лацонь разработкат. Москувонь аймакса «Патриот» паркса панжевсь «Армия 2024» военно-техническяй народъётконь форумсь. Россиянь Президентсь видеосотксть вельде тяшкстась: форумсь тя оцюдонга оцю события, конанди явихть мяль сембе масторонь специалисттне и эксперттне. Сон панжи од кит-ятт аф пельксонь тиендемань марстонь тевса и национальнай мяльхнень араламаса. Эряви азомс, форумса примай участия Мордовияста делегациясь.