Александр Куняевень 85 иетненень алтазь невтема. (ЭРЗЯ)
Пель пингеде теде икеле сонзэ эйстэ содасть аволь ансяк Мордовиясо, но и Советской Союзонь весе ужинетнесэ. Мемориальной музейсэ «Люди долга и чести» проектэнть лувсо панжовсь Социалистической Важодемань Героенть Александр Куняевень 85 иетненень алтазь невтема. Сонензэ арасельть колоньгемень иетькак, зярдо аравтызь Отяжбуень тиринь Дюрькина велень Калининэнь лемсэ колхозонь прявтокс. Александр Трофимович пурнась эсензэ вакс виев команда. Курок шкасто сынь пачкодсть истямо цётамос, мик хозяйствась республиканть келес кармась икелев молицятнень эйстэ вейкекс.Од арсемань эрямос совавтыця, зярдояк эзь пеле од тевде-валдо. Модаазоронь ёжомараямодонть башка Александр Куняев ульнесь пек набой. Свал ловсь, кунсоломс эряви васняяк моданть, мейле уш кабинетсэ аштиця чиновниктнень. Кудосо жо ульнесь вечкиця ды вечкевикс мирде ды тетя. Александр Куняевень тевтопавтоманзо тешкстазь Ленинэнь колмо орденсэ, Октябрянь революциянь орденсэ ды Социалистической Важодемань Героень сырнень тештьсэ. Сон а весть кочказель СССР-нь ды РСФСР-нь Верховной Советэнь депутатокс. Тусь эрямосто рана, но кадсь мельганзо истямо тешкс, кона течинь чис тонавты ды кармавты важодеме ламонь.