Россиянь Президентэнть Владимир Путинэнь Федеральной Собраниянтень кучомазо! (ЭРЗЯ)
Тешкстасынек, те кучомась Государствань Прявтонь эрьва иень тев. Сон ветяви 1994-це иень даволковонь 24-це чистэ саезь. Коень коряс, церемониясь ютась Кремлёвской дворецэнь Георгиевской залсо. Посланиянь кунсоломо тердезельть тёжадо ламо ломанть. Те Федерациянь Советс совицят, Государственной Думань депутатт, Правительствас совицят, Конституционной, Верховной, Арбитражной судонь, религиозной конфессиянь прявтт, региононь губернаторт, Федерациянь субьектэнь законодательной собраниянь представительть, ютксост регионтнэнь общественной палатань ды массовой информациянь средствань прявтт. Ламо общественной представительть. 705 акрредитованной журналистт.
Те кучомась Россиянь парламентэнь кавто палататненень Конституциянь коряс ловови Президентэнь прявт тевекс. Пшкадемась карми Россиянь властень програмной прявт документэкс, конасонть Государствань Прявтось мель яви сех покш кевкстематненень, стакачитненень. Тешкстасынек, те иень од ёнксокс кармась кучомань ютавтома залсонть инфографика марто покштояк покш экранонь путомась.
Пшкадемасонть Россиянь Президентэсь васняяк кортась кода седе тов карми молеме Россиянть касомазо. Васенце таркасо аштесь Россиянь экономикань реформатне, нужачисэ эриця ломантненень лездамось, социальной кевкстематне ды раськеютконь тевтне. Теде башка Президентэсь покш мель явсь миграциядо кевкстематненень, оборонной сферантень.
Эсь кучомасонзо Государствань Прявтось кортась масторонь законтнэде, сынст топавтовомадо. Россиянь Президентэсь тешкстызе, што эряви седе пштистэ ваномс экономиканть мельга. Кастомс демографиянть, кувакалгавтомс ломантнень эрямонть, покшолгавтомс пенсиятнень, свалшкане ваномс индексациянть мельга. Маласо 6 иетнень перть одкстомтомс оштнэнь, теке марто ванстомс кезэрень культуранть. Ютазь иенть перть эрямо таркаст паролгавтызь Россиянь 3 миллионт эрицят. Президентэнть валонзо коряс, эрьва иес те цифранть эряви кастомс 5 миллионс. Тень кисэ эряви вишкалгавтомс ипотекань коряс процентной ставканть, ламолгавтомс эрямо таркань кавонзазь метрань строямонть ды вишкалгавтомс сонзэ кис питненть. Ней эрьва ие строявить 80 миллионт кавонзазь метрат эрямо таркат, эряви – 120 миллионт! Эсь кучомасонзо Россиянь Президентэсь пшкадсь региононь прявтнэнэнь, штобу сынь седе пштистэ вановольть регионтнэсэ китнень мельга. Сынст одкстомтомас ярмаконь явоманть арсеви кастомс кавксть. Одкстомтомс электроэнергетиканть, тень кисэ тевс нолдамс оптволокнанть, а васоло, аволь покш велетнесэ связенть ды интернэтенть теемс спутник вельде.
Кортазель здравоохранениясо учовиця полавтоматне, конатнень лангс истяжо арсеви кавксть кастомс расходтнэнь. Медицинасо оптимизациянть лемдизе аволь виде эскельксэкс. Валонзо коряс, эряви арсемс истямо программа, конань вельде Россиянь эрьва эрицясь эрьва ие ютаволь профосмотра. Те карми васенце эскельксэкс, кона киртясы онкологиясо ормалгадыцятнень ламочинть. Ёвтась сюкпрянь валт важодемаст кисэ врачтнэнень, тонавтыцятненень, культурасо важодицятненень. Лецтинзе «панжиковонь указтнэнь», конатне, валонзо коряс, малав весе топавтовсть. Яволявтынзе и культурасо учовиця полавтоматнень.
Образованиянь сферасо Россиянь тонавтыцятне ды тонавтницятне эрьва кодамо невтевкстнэнь коряс аштить васенце таркасо. Мельсэнзэ од тонавтнема иестэнть саезь тевс нолдамс икелепелень профориентациянь коряс проектэнть. Башка мель явсь инфлянциянтень, сонзэ вишкалгавтомантень. Тешкстама, ней сон кавтодо цють седе ламо процентт. Сюкпрянь валт ёвтась Россиянь аграрийтненень, конат 2017-це иестэ пурнасть сюронь рекордонь урожай. Пшкадсь сеть структуратненень, конат кемекстыть ансяк ушодыця предпринимательтнень, улемс тенст аламодо седе седеймарицякс. Вооруженной вийтнень виевгавтомантень эсензэ кортамосо Россиянь Прявтось явсь сех покш тарка! Россиянь новейшей историясонть те 24-це, а Владимир Путинэнь туртов – Федеральной Собраниянтень 14-це Послания.