Атерь велень Эйнь Кудсь учи спортонь кельгихнень! (МОКША)
Од кизоть ушетксонц эзда Атюрьевскяй райононь Атерь велеса панжевсь Эйнь Дворецссь, конань эса пяк учсесть сембе эряйхне. Сон мазоптозе марнек райцентрать. И тянь къвалма корхтайхть сембе! Эйнь Аренать панжеманц мельгя хоккейсь тяса кармась аньцек сяда касома и вииякшнема. Тяфтама казнять эса районць учсесь пяк кунара. Маштыкс тренер мархта эрь кодама кизонь хоккейнай командатне лац налхксихть эрь кодама турнирса. Кода азозь Эйнь аренать оцюнянза: тейст казьфоль куд, коса синь кармайхть поладкшнема сяськомань койхнень и арьсихть тонафтомс пяк цебярь хоккеистт.Оцю хоккейнай семьять мазопнесы стирень командась, синь лацост тяфтама Мордовияса аш косонга. Налхкомаснон и тазашиснон эзга синь ёфси аф лядондыхть алянь командатнень эзда. Минь съёмочнай группаньконди ульсь кода содамс хоккейнай маштомашить и эсь лангсонок варжамс хоккейнай формать сталмонц. Атерень ломаттнень хоккейсь версост ащи генетикань уровеньца. Тяса иттне тонафнихть якама и сяка жа пингть конька лангса ащема. И аш мезевок, къда васендакиге ули кода ламоксть прашендомс. Лездома тяниень пингть эзда сай маштыкс тренерсь, конац арьсесь шабатненди аф кя лацонь тонафнемань методика. Аньцек минь съёмочнай групаньконьди эсь маштомашинц хоккейса няфтезе и райононь оцюнясь. Аф фкя хоккей мархта эряйхть Атерень ломаттне. Тренировкада меле хоккеистне кадондсазь эйть спортонь кельгихненди. Массовай арнемась ётафневу фалу и эсь пингстонза. Эйнь аренать покодемац тиф станя, што школаса тонафнихненди пъцтай райононь сембе школатнень эзда ули кода сашендомс тей специальнай автобусса. И тя сембось питнефтома. А инжихне лия райоттнень эзда сашендыхть тяза семьяснон мархта. И сембонь мелезост. Аф эряви таколдомс, къда тинь аш коньканьте. Аф кунара тяса рамафоль сядода сяда лама од комплектта. Эйфтома кивок аф ляды.