«Этношкола «Кой» проектсь Пензань аймакса! (МОКША)

Пензенскяй  областьса  тя проектть   мархта минь ломаненьке ульсть  ни  ламоксть. Эряви азомс,  шабрань модать лангса эряйхть мокшет, эрзят и лама лия  национальность.  Улихть башка  велет, коса  минь кялень   ломаттне   шарфнихть сяда  оцю  мяль минценнети. Кой-кона  школатнень   эса вятеви факультатив –  аф ламода,  но тонафневихть кяльхне.  Мокшан велеть   лемоцка  бта сявф мокшетнень  эзда, но видеста   азомс,   ашеме васьфте ломатть,  конат корхтальхть   минь кяльсонк. Азорхне и инжихне   пуромоме тястонь идень искусствань  школав. Инжихнень  еткса  ульсть   пединститутонь  и  университетонь  преподавательхть,  студентт,   конат  няфтсть   сембонь   инголе пяк цебярь  концерт,  морасть  мокшэрзянь    и рузонь   кяльса морот.  Мордовиянь  заслуженнай  поэтсь Рая Орлова  лувозень эсь   стихонзон.  Вузонь ломаттне   лама азондсть   университетса и институтса  тонафнемать  колга.  Пензань  аймаксь инь  малась минь  республиканьконди, сяс  од ломаттненди  мярькфоль  кинь   ули мялец,   кочкалезь минь   вузоньконь, сальхть  тонафнема   Саранскяи. Мокшанскяй райононь  школань библиотекатненди казьфоль  эрь кодама  литература, сюконямань валса отмечафтольхть   ламоц  тястонь работникне. Тяда  башка, иттненди и синь учительснонды инжихне няфтсть  эрь кодама   мастер-класст. Тонафтозь   синь котф лангса  рисавама, някань тиема,   морама и   кштима.  Сембе    оцю мяльса  кунцесть пара  тефненди,  тонадсть  цебярти.